Հասարակածային տրամագիծը՝ 49.500 կմ Զանգվածը՝ 1,02x1026 կգ Միջին հեռավորությունը Արեգակից՝ 4.500 մլն կմ Նվազագույն հեռավորությունը Երկրից՝ 4.300 մլն կմ Առանցքի շուրջը պտտման պարբերությունը (օր)՝ 17 ժամ 6 րոպե Արեգակի շուրջը պտտման պարբերությունը (տարի)՝ 165 երկրային տարի Ամպածածկույթի վերին եզրի ջերմաստինճանը՝ –210օC Արբանյակների քանակը՝ 8
Նեպտունն Արեգակնային համակարգի 8-րդ մոլորակն է` ըստ Արեգակից ունեցած հեռավորության: Անվանումն ստացել է հին հռոմեական ծովերի աստված Նեպտունի անունից: Այն 1846 թ-ին միմյանցից անկախ հայտնաբերել են անգլիացի Ջ. Ադամսը և ֆրանսիացի Ու. Լևերյեն՝ մաթեմատիկական հաշվարկների միջոցով՝ հարևան Ուրան մոլորակի շարժման հետագծի վրա այդ ժամանակ դեռ անհայտ մոլորակի՝ Նեպտունի ձգողական ուժի ունեցած ազդեցությամբ: Նեպտունի զանգվածը 17,2 անգամ մեծ է Երկրի զանգվածից, իսկ կառուցվածքը շատ նման է Ուրանի կառուցվածքին: Նեպտունի մթնոլորտը բաղկացած է ջրածնից՝ հելիումի և մեթանի փոքրաքանակ խառնուրդով: Մակերևույթը ծածկված է սառած ջրի և հեղուկ գազերի (այդ թվում՝ նաև մեթանի) վիթխարի, խորը օվկիանոսով, իսկ կենտրոնում գտնվում է չափերով Երկրին համաչափելի ջրածնի պինդ մետաղական միջուկը: Նեպտուն մոլորակը մեր Երկրի նման երկնագույն է, ինչը պայմանավորված է նրա մթնոլորտում պարունակվող մեթան գազով: Վերջինս կլանում է արեգակնային լույսի սպեկտրի կարմիր մասը և անդրադարձնում է երկնագույնը: Երբեմն Նեպտունի մթնոլորտում հայտնվում են մութ բծեր, որոնք փոթորկվող ուժեղ մրրիկներ են: Աստղադիտակով դիտելիս երևում են Նեպտունի շուրջը պտտվող 2 արբանյակներ՝ Տրիտոնը և Ներեիդան: 1977 թ-ին արձակված և 1989 թ-ին Նեպտունի մոտով անցած «Վոյաջեր-2» տիեզերական սարքը հայտնաբերել է այդ մոլորակի ևս 6 արբանյակ: Դրանցից մեկը՝ Պրոթեոսը, քիչ ավելի մեծ է Ներեիդայից, մնացած 5 արբանյակները շատ փոքր են: Տրիտոնը Նեպտունի ամենամեծ արբանյակն է. նրա տրամագիծը 2700 կմ է, և Նեպտունի շուրջը պտտվում է արբանյակների մեծ մասի պտտման հակառակ ուղղությամբ:
|
