Այբուբեն
"/*--9999999999ԷՇ
-09999999999ԸՈ
-09999999999ԹՉ
/*--*9999999999ԺՊ
/*--*9999999999ԻՋ
09999999999ԼՌ
09999999999ԽՍ
099999conveԾՎ
099999s3ԿՏ
and 099999s3ՀՐ
and 199999ԱՁՑ
and(199999ԲՂՈւ
and(9999 99999ԳՃՓ
" and9999/99999ԴՄՔ
" and9999999999ԵՅՕ
"/*--9999999999ԶՆՖ
Արագ Որոնում


Պետական կարգը՝  
միապետություն
Մայրաքաղաքը՝ 
Օսլո
Տարածքը՝ 
385,2 հզ. կմ2
Բնակչությունը՝ 
4,6 մլն
Պետական լեզուն՝ 
նորվեգերեն
Դրամական միավորը՝ 
նորվեգական կրոն
Նորվեգիայի խորհրդարանի շենքը Օսլոյում
Ֆ. Նանսենի կիսանդրին Սպիտակում՝ Ֆ. Նանսենի անվան կլինիկական հիվանդանոցի բակում
Վագրը Նորվեգիայի խորհրդանիշն է:
Սկանդինավյան ծալքավորության մի հատված
Նորվեգիայի Թագավորություն
Նորվեգիան պետություն է Հյուսիսային Եվրոպայում՝ Սկանդինավյան թերակղզում: Երկրի տարածքը ձգվում է հարավ-արևմուտքից հյուսիս-արևելք 1750 կմ երկարությամբ և 7–430 կմ լայնությամբ: Նորվեգիային են պատկանում Յան Մայեն, Բուվե կղզիները և վարչական հատուկ միավոր Շպիցբերգեն կղզեխումբը:
Լեռնային երկիր է: Տարածքի մեծ մասն զբաղեցնում են Սկանդինավյան լեռները, հյուսիսում Ֆինմարկեն սարահարթն է: Ծովամերձ նեղ (40–50 կմ) շերտն զբաղեցնում են դաշտավայրերը: Հյուսիսային և Նորվեգական ծովերի ափերը մասնատված են ֆիորդներով: Ընդերքում կան երկաթի, նիկելի, պղնձի, մոլիբդենի, կոբալտի հանքավայրեր: 1960–70-ական թվականներին Հյուսիսային ծովում հայտնաբերվել են նավթի և գազի հարուստ պաշարներ, Շպիցբերգեն կղզեխմբում՝ բարձրորակ քարածուխ: 
Կլիման չափավոր ծովային է, տարածքի 1/3-ն ընկած է բևեռային շրջագծից հյուսիս: Հյուսիսատլանտյան տաք հոսանքով պայմանավորված՝ ձմեռը մեղմ է, ծովերը չեն սառչում: Գետային ցանցը խիտ է: Գետերը (ամենախոշորներն են Գլոմման, Լոգենը) սահանքավոր են, ջրառատ, արագահոս և ունեն ջրաէներգետիկ մեծ պաշարներ: Լճերն զբաղեցնում են տարածքի 4 %-ը: Ամենախոշորը Մյոսան է: Մեծ տարածություններ ծածկված են սոճու և եղևնու անտառներով: Կենդանիներից կան աղվես, լուսան, կուղբ, կզաքիս, նապաստակ և այլն:
Նորվեգիան տարբեր ժամանակներում գտնվել է նախ` Դանիայի, ապա՝ Շվեդիայի գերիշխանության ներքո: Անկախություն է ձեռք բերել 1905 թ-ին: 
Երկրի բնակչության 98%-ը նորվեգացիներ են: Ազգային փոքրամասնություններից են ասամները և կվենները, բնակվում են նաև շվեդներ, դանիացիներ և այլք: 
Խոշոր քաղաքներն են Օսլոն,  Բերգենը, Տրոնհեյմը:
Հնում Նորվեգիայի տարածքը բնակեցված է եղել գերմանական ցեղերով: VIII դարի կեսերից մինչև XI  դարը նորվեգացիները մասնակցել են վիկինգների արշավանքներին: Երկրի քաղաքական միավորումն սկսվել է IX-X դարերում, ավարտվել XIII դարում: XIV դարից Նորվեգիան ընկել է դանիական տիրապետության տակ, որը 1814 թ-ին Քիլյան խաղաղության պայմանագրով երկիրը հանձնել է Շվեդիային: Վերջինս ուժով Նորվեգիային պարտադրել է շվեդա-նորվեգական ունիան, որը գոյատևել է մինչև 1905 թ.:
Առաջին համաշխարհային պատերազմի տարիներին Նորվեգիան պահպանել է չոզոքություն: Երկրորդ համաշխարհային պատերազմի ժամանակ այն գրավել է Գերմանիան, որից  ազատագրվել է վերջինիս կապիտուլյացիայից հետո՝ 1945 թ-ի մայիսի 8-ին: 
Նորվեգիան ունի զարգացած արդյունաբերություն: Երկրում էլեկտրաէներգիայի ավելի քան 99 %-ը արտադրվում է ջրէկներում (բնակչության 1 շնչին ընկնող էլեկտրաէներգիայի արտադրությամբ Նորվեգիան աշխարհում գրավում է առաջին տեղը): Առավել զարգացած է գունավոր մետաղաձուլությունը (հատկապես՝ մագնեզիումի, ալյումինի, նիկելի, պղնձի արտադրությունը), նավթաքիմիան, փայտամշակումը, թաղանթանյութ-թղթի, թեթև և սննդի ճյուղերը: Մեքենաշինության մեջ առանձնանում են նավաշինությունը, էլեկտրատեխնիկան և ռադիոէլեկտրոնիկան:
Անտառապատ ու լեռնոտ հյուսիսային շրջաններում հողը դժվար է մշակվում: Բուսաբուծության նպատակներով օգտագործվում է երկրի տարածքի միայն 3 %-ը: Այդ պատճառով էլ գյուղատնտեսության հիմնական ճյուղն անասնապահությունն է: 
Մշակում են հացահատիկային և կերային մշակաբույսեր, կարտոֆիլ, բանջարեղեն:
Զարգացած են նաև մուշտակագործությունը (գլխավորապես՝ ջրաքիսի) և ձկնորսությունը (փրփրուկի և տառեխի):
Նորվեգիայի աշխարհագրական դիրքի առանձնահատկությունները պայմանավորել են նավաշինության և նավագնացության վաղ զարգացումը: Նորվեգացիների նախնիներն արդեն VIII դարի վերջին կառուցել են նավեր և կատարել երկարատև նավարկություններ, հայտնագործել Իսլանդիան, Գրենլանդիան, Հյուսիսային Ամերիկան: Նորվեգացիները մեծ ավանդ ունեն Արկտիկայի և Անտարկտիկայի հետազոտման գործում: Ֆրիտյոֆ Նանսենն առաջին անգամ դահուկներով անցել է Գրենլանդիան, իսկ 1893–96 թթ-ին գլխավորել «Ֆրամ» նավի արշավախումբը: Դեպի Արկտիկա և Անտարկտիկա արշավախմբեր է ղեկավարել Ռուալ Ամունդսենը. նա առաջինն է հասել Հարավային բևեռ (1911 թ-ին):
Հանրահայտ են նաև նորվեգացի դրամատուրգ Հենրիկ Իբսենը, կոմպոզիտոր Էդվարդ Գրիգը, ծովագնաց Թուր Հեյերդալը և ուրիշներ:
Նորվեգիայի խորհրդարանի նոբելյան կոմիտեի կողմից է տրվում Խաղաղության նոբելյան մրցանակը:

Մեծ եղեռնի տարիներին և դրան հաջորդած ժամանակաշրջանում հայ գաղթականների դրության բարելավման համար հսկայական աշխատանք է կատարել Ֆրիտյոֆ Նանսենը: Նա խստագույնս դատապարտել է Հայոց ցեղասպանությունը, նրա օգնությամբ բազմաթիվ հայ փախստականներ ստացել են «Նանսենյան անձնագիր», ինչը որոշ չափով թեթևացրել է նրանց վիճակը: Նանսենը բազմաթիվ հոդվածներ ու զեկուցագրեր է նվիրել հայ ժողովրդի պատմությանը և Հայաստանին: 1925 թ-ին նա անձամբ եկել է Հայաստան՝ Ցեղասպանության տարիներին տարագրված հայերին Հայաստանում վերաբնակեցնելու առաքելությամբ: Երևանում կան Ֆ. Նանսենի անվան փողոց, դպրոց, գործում է Ֆրիտյոֆ Նանսեն միջազգային հիմնադրամը:
Հայաստանում 1988 թ-ի Սպիտակի երկրաշարժից հետո Նորվեգիայի կառավարության հատկացրած միջոցներով Սպիտակ քաղաքում կառուցվել է «Նորվեգական գյուղ», կլինիկական հիվանդանոց (Ֆրիտյոֆ Նանսենի անվան):

Հայերը Նորվեգիայում
Հայերը Նորվեգիա եկել են 1970, երկրորդ ալիքը` 1990-ական թվականներից: Ներկայումս հայերի թիվը հասնում է 1000-ի, որոնք կենտրոնացած են Օսլոյում: Առավելապես արհեստավորներ են, սպասարկման ոլորտի աշխատողներ: Գործում են Հայ-նորվեգական միությունը, որը համայնքը ներկայացնում է երկրի իշխանությունների առջև, և հայկական կիրակնօրյա մեկ դպրոց: